Mat der Suite vu sengem Buch Jenes Gedicht & Mit nichts, fir dat de lëtzebuerger Schrëftsteller Jean-Paul Jacobs am Joer 2005 mam Prix Servais ausgezeechent gouf, ass dem Dichter och am zweete Band e Wierk vun origineller Lyrik gelongen: Glanz und Elend der Posie ass an engem provokanten, ironesche Stil geschriwwe ginn, a gouf 2009 an der Kategorie Literatur vum Lëtzebuerger Bicherpräis nominéiert. Wou et am éischten Deel haaptsächlech ëm sexuell Perversiounen a Provokatioune geet, steet am J.P. Jacobs sengem neie Band éischter d’Thematiséierung vum Lyriker – Dilemma am Mëttelpunkt.

Engersäits huet de Lyriker Spaß um Dichten awer op der anerer Säit wäert en déi Suerg doriwwer, ob seng Zeile beim Lieser ukommen oder net, ëmmer mat sech droen:

die Sänfte                                                          dichter im nebel

ach all meine gedichte                                    seit den frühen morgenstunden schon

ein fest ein desaster                                        umhüllt ein dichter nebel den dichter

dieses gezierte dieses umrankte                    und der befürchtet dass er bis zum abend hin

dieses verlorene                                               noch dichter werden könnte

 

Obwuel dës Thematik zimlech präsent ass, kommen mythesch, märchenhaft, humanistesch an och historesch Elementer awer net ze kuerz. Mieresjongfraen, Nymphen oder Göttinnen wéi d’Medusa verdréien dem Dichter de Kapp an historesch Personnagen léisst den Auteur op eng ironesch Manéier mat afléissen, sief et andeems en déi wonnerschéin Kinnigi vu Saba e Gedicht vum Wilhelm Müller op arabesch liese léisst, de Räichtum vun der Madame de Pompadour bewonnert oder de Marcus Aurelius a senger ganzer Männlechkeet duerstellt. Och fir d’Literatur bedeitend Perséinlechkeete wéi de Petrarca an den Heinrich Heine kommen am Jacobs senge Gedichter vir.

Wa mer de Gedichtband lo duerch säi rosaroude Cover mat engem rosaroude Brëll aus enger rosarouder Perspektiv betruechten, da gesi mer, dass déi erotesch Bezéiung zwësche Mann a Fra an hierem ganze Glanz an an hierem ellensten Elend beschriwwe gëtt. Sou gëtt dat onerreechbart weiblecht Geschlecht als Personifizéierung vun der Verféierung selwer duergestallt an de Mann gëtt als dat triebgesteiert Geschlecht ugedeit fir deen d’Léift vun enger Fra ganz oft onerreechbar ass. Den Auteur benotzt och gäre Metapheren a stellt d’Juegd vum Mann op d’Fra zum Deel metaphoresch, awer och extrem provokant duer:

La gioia della caccia                                                 im zauberwald

Hase fasan und hirsch                                       o ein beau just da im walde steht

Gehen gemeinsam auf die pirsch                       wo der schöne karl sich dreht

Ei was wird das für eine wilde jagd                       der zufall hat es so gewollt

Rund um den schönen po der magd                auch wenn die hirschkuh böse schmollt

 

Dotëschent liwweren e puer gewoten Zeechnunge vum Kënschtler Matthias Pelzer déi passend Illustratiounen an deenen d’Fra als Motiv – passend zu de Gedichter – en scène gesat gëtt.

Natierlech dierf een net vergiessen hannert der märchenhafter Facette, dem éiwegen Dilemma vun engem Kënschtler an dem hoffnungslose Minnesang vun der männlecher Spezies, dat kreativt Spill mat der Sprooch unzeerkennen: D’Gedichter si wéi eenzel Gedankestréim uneneegereiht an dobäi loosse formidabel originell Neologismen wéi „pharaonenziegenmelker“ oder „diademrotschwanz“ an dadaistesch Spiller mat der Sprooch wéi „und piff und paff und wunderbar“ d’Häerzer vun de Linguisten an de Poete méi héich schloen.

Glanz und Elend der Poesie ass also am Groußen a Ganzen net nëmmen e Gedichtsband deen iwwert déi verschiddensten Thematiken philosophéiert, mee och modern, originell, witzeg a kreativ Sproochenelementer opweist a soumat net nëmmen eng plus-value fir Leit mat enger poetescher Oder duerstellt, mee och fir déi, déi sech bis lo nach net sou vill mat der Poesie beschäftegt hunn.

ohne titel

 

die poesie mag wenn es sein muss

in alle extreme gehen

ich kann ihr dahin nicht mehr folgen


Jean-Paul Jacobs, Glanz und Elend der Poesie, Gedichte, Luxembourg, Edition Phi, 2009.

 

Sabrina Roob

Är Commentairen