Well d’Demande no Lëtzebuergesch-Coursen an der Erwuessenebildung ëmmer méi an d’Luucht geet, gëtt och kontinuéierlech un neiem Unterrechtsmaterial geschafft.
D’Angie Gaasch, d’Jackie Messerich an de Luc Schmitz aus dem INLL waren e Méindeg, 17. Abrëll 2023, am Colloque vun der Luxemburgistik, fir dat neit Material fir den Niveau B2 aus der Rei „Schwätzt Dir Lëtzebuergesch?” (SDL) virzestellen (ausgeschafft vum A. Gaasch a J. Messerich).
An dat Bescht? Et ass alles online accessibel iwwer den Internetsite sdl.inll.lu.
Huelt Iech e bëssen Zäit – och als Mammesproochler – a klickt Iech duerch déi verschidde Léiereenheeten: An 9 Dossiere fannt Der eng Rei Informatiounen iwwer d’Kultur- an d’Literaturzeen zu Lëtzebuerg mat passende Schreif- a Schwätzübungen an aneren Exercicer, fir Lies- an Héierverstoen ze üben. Et geet awer och ëm einfach Alldagstheeme wéi Noperschaft oder Reesen – alles, fir d’Leit aus verschiddene Kulturkreesser an Altersklassen ze motivéieren, sech op Lëtzebuergesch auszedrécken.
Theemebléck iwwer d’Grammaire si fir den Niveau B2 net agebaut ginn, well d’Grondstrukture vum Lëtzebuergesche schonn op deenen aneren Niveauen (A1, A2, B1) erkläert ginn. Hei kann dann d’Léierpersonal individuell entscheeden, wéi eng Elementer ze widderhuele sinn a wou nach heefeg Feeler entstinn.
Dëst Léierwierk ass als éischt an der SDL-Rei just online publizéiert (den Design an den Opbau sinn net als Buch, mee als online Ressource konzipéiert ginn) an Dir kënnt gratis op all d’Inhalter zougräifen.
Mir wënschen Iech vill Spaass beim Entdecken an deene Leit, déi Lëtzebuergesch als Friemsprooch léieren, vill Spaass mat der Sprooch.
