Dir hutt Iech schonn ëmmer gefrot, wat mir mat all den Opnamen aus der Schnëssen-App maachen a wéi déi flott Grafiken a Kaarten entstinn? Dir hutt Interessi un der Lëtzebuerger Sprooch a wëllt selwer fir een Dag mat eis als Sproochfuerscher aktiv ginn?
Dofir invitéiere mir fir de 16. November (9h-17h) interesséiert Leit bei eis op d’Uni, fir zesummee mat eis Opnamen auszewäerten.
Wat brauch een?
- grondleeënd Computerkenntnisser (Excel)
- Google-Account
- Kopfhörer (mam ‚klengen‘ (3,5mm) Stecker)
- gutt Oueren a Freed un der Fuerschung
Wat maache mer?
D’Zil vum Workshop ass et, zesumme mat Iech nei Opnamen auszewäerten, entspriechend Grafiken a Kaarten ze erstellen an iwwert sproochlech Variatioun an eis Fuerschung iwwert d’Lëtzebuergescht ze schwätzen. No engem Abléck an eise Schnëssen-Projet an enger klenger (technescher) Uleedung zum Auswäerten, gitt Dir also selwer aktiv, lauschtert Iech eng Hellewull Opnamen un a léiert déi vill Facettë vun der Sprooch kennen. Well konzentréiert Nolauschteren a Schaffen och emol midd an hongereg mécht, suerge mir natierlech och fir e gemeinsamt Mëttegiessen an déi néideg Kaffispausen.
Wéi mellt ee sech un?
Umelle kënnt Dir Iech bis den 2. November via E-Mail op schnessen@uni.lu. Bei Froe kënnt Dir eis och einfach iwwert eis Facebook-Säit kontaktéieren. Plaz hu mer fir bis zu 20 Persounen.
Mir freeën eis op Iech!
Är Schnëssen-Ekipp
Nathalie Entringer
Peter Gilles
Sara Martin
Christoph Purschke
Pol Breser